КР ЭКМ караштуу Монополияга каршы жөнгө салуу кызматынын Жалал-Абад облусундагы бөлүмүнүн кызматкерлери жергиликтүү мамлекеттик органдардын, тиешелүү кызматтардын өкүлдөрү жана УТРК «Жалал-Абад» телеканалынын журналисттери менен биргеликте эт азыктарына коюлган жөнгө салынган бааларды көзөмөлдөө боюнча рейд өткөрүштү.

Текшерүүнүн жүрүшүндө Жалал-Абад шаарынын борбордук базарлары жана шаар аймагында жайгашкан эт дүкөндөрү камтылды. Иш-чаранын негизги максаты – социалдык мааниси бар азык-түлүк товарларына негизсиз баанын өсүшүн алдын алуу жана керектөөчүлөрдүн укуктарын коргоо болуп саналат.

Рейд учурунда адистер тарабынан сөөксүз эттен тышкары уй жана кой этин белгиленген жөнгө салынган баалардан 1 килограммына 20 сомго кымбат сатуу фактылары аныкталды.

Текшерүүнүн жыйынтыгы боюнча эреже бузуучуларга карата административдик чаралар көрүлдү. Кыргыз Республикасынын «Бузуулар жөнүндө» кодексинин 290-беренесинин негизинде административдик айып пул салынды.