2024-жылдын 31-октябрында Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматында Кыргыз Республикасынын Министрлер Кабинетине караштуу Жарандык Авиация Мамлекеттик Агенттигинин жана ата мекендик авиакомпаниялардын өкүлдөрү менен жумушчу кеңешме болуп өттү.

Кеңешмеде ички авиаташуулар рыногунда учурда болуп жаткан абал талкууланды. Бишкек-Ош багыты боюнча авиабилеттердин баасы 3500-4000 сомдон жогору экендиги белгиленди.

Ошондой эле, “Асман Эйрлайнс” ЖЧК авиакомпаниясына “улуттук” статусун берүү боюнча көйгөйлүү маселелер талкууланды, анткени компания “Манас” Эл аралык аэропорту” ААКнын туунду ишканасы болуп саналат. Бул жол-жобо “Асман Эйрлайнс” ЖЧК авиакомпаниясына жеке авиакомпаниялар менен тең атаандашууга мүмкүндүк берет, ошондой эле жергиликтүү аэропорттордун жүгү жана жаңы жумуш орундарын түзүү бөлүгүндө атаандаштыкты өнүктүрүүгө жана бекемдөөгө мүмкүндүк берет.

Бул жол-жобо авиакомпанияга өзүнүн техникалык базасын өз алдынча өнүктүрүүгө, жаңы аба кемелерин сатып алууга жана жаңы ички, ошондой эле эл аралык рейстерди ачууга мүмкүндүк берет.

Жолугушуунун жыйынтыгында, монополияга каршы мыйзамдардын алкагында мындан аркы иш алып баруу тууралуу макулдашуу ишке ашырылды.