Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматынын Жалал-Абад облустук бөлүмүнүн кызматкерлери, 2023-жылдын 1-ноябрында Базар-Коргон райондук мамлекеттик администрациясынын жетектөөчү адиси Т.Тиленбаев, Базар-Коргон райондук салык башкармалыгынын бөлүм башчысы К.Кудайбердиев жана башка тийиштүү кызматтын өкүлдөрү менен биргеликте Базар-Коргон районундагы социалдык жактан маанилүү болгон товарларга анын ичинен 1-сорттогу буудай унунан жазалган нан азыктарына (бөлкө нан) жана тандыр нанына (лепешка) жана көмүрдүн бааларына биргелешкен мониторинг жүргүзүлүп, мониторингдин жыйынтыгында төмөнкүлөр аныкталды:

Базар-Коргон шаарынын борбордук базарындагы нан сатуучу жайлардагы нандын баалары белгиленген баага салыштырмалуу туруктуу экендиги аныкталып, нан сатуучуларга бааларды негизсиз жогорулатпоо боюнча түшүндүрүү иштери жүргүзүлдү.

Ушундай эле иш-чара Базар-Коргон шаарынын А.Текебаев көчөсүндө уланып, аталган жердеги бөлкө нан бышыруучу жеке ишкер К.Иманакунова 380гр бөлкө нанын дүң баада 24.00 сомдон сатып, белгиленген баадан 2.60 сомго жогору сатып жаткандыгы аныкталып, бөлүм тарабынан аталган укук бузууну жоюу максатында жазма эскертүү берилди.

Андан кийинки биргелешкен мониторинг Базар-Коргон шаарынын Ленин көчөсүндө жайгашкан “Юрта” азык-түлүк сатуучу түйүнүндө уланып, мониторингдин жыйынтыгында 412гр бөлкө нанынын чекене баасы 29.00 сомдон сатылып жаткандыгы аныкталып, белгиленген баадан 2.30 сомго жогору сатканы үчүн жеке ишкер М.Сатыбалдиевага бөлүм тарабынан жазма эскертүү берилди.Базар-Коргон шаарынын Ленин көчөсү менен Ж.Аттокуров көчөлөрүнүн кесилишиндеги көмүр сатуучу жайлардагы көмүрдүн бааларына мониторинг жүргүзүлүп, жергиликтүү көмүрдүн баасын белгиленген баадан 0,20 сомго жогору сатып жаткан учурлар аныкталып, сатуучуларга бааларды негизсиз жогорулатпоо боюнча жана белгиленген баадан жогору сатышса айып пулдар салынаары боюнча эскертилди.