Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматы/Служба антимонопольного регулирования төрагасынын орун басары А.А.Мамыралиев 2023-жылдын 25-сентябрь күнү Жалал-Абад шаарында ун бааларынын учурдагы абалы менен таанышуу максатында иш сапарда болду. Иш сапардын алкагында, Жалал-Абад облустук бөлүмүнүн кызматкерлери менен биргеликте Жалал-Абад облусунун аймагындагы ун өндүрүүчү “Дан-Юг” ЖЧКна барып, ал жердеги өндүрүлүп жаткан ундун көлөмү, баасы жана запастары боюнча маалымат алды.
“Дан-Юг”ЖЧКнун жетекчисинин айтымында, завод күнүнө 100 тонна ун өндүрүп чыгарын жана азыркы учурда 12 000 тонна буудайдын запасы бар экенин билдирди. Учурда ундун, буудайдын запастары 3-4 айга жетээрин жана буудайды ташып келүү иш-чаралары жүрүп жатканын айтты. “Дан-Юг” ЖЧКнун ун заводунда азыркы учурда 1-сорт 1 кап ундун (50кг) баасы 1500 сомдон ал эми 2-сорт ундун (50кг) баасы 1100 сомдон сатылып жатат.
Андан ары Кызматтын төрагасынын орун басары А.А.Мамыралиев Жалал-Абад шаарынын аймагындагы базарларда жана ири соода түйүндөрүндө унга болгон бааларга мониторинг жүргүздү. Жалал-Абад шаарынын базарларындагы жана ири соода түйүндөрүндөгү ун сатуучулар, азыркы учурда импорттук ундардын кымбат келип жаткандыгынан улам нандын баалары жогорулагандыгын билдиришти. Жакынкы күндөрдөн бери жергиликтүү өндүрүштөгү унга болгон суроо-талап көбөйгөндүгүн айтышты.
Бөлүмдүн кызматкерлери тарабынан сатуучуларга Кыргыз Республикасынын “Атаандаштык жөнүндөгү” жана “Керектөөчүлөрдүн укуктарын коргоо жөнүндөгү” мыйзамдарында көрсөтүлгөн талаптар боюнча жана унга болгон бааларды негизсиз жогорулатпоо боюнча түшүндүрүү иш-чаралары жүргүзүлдү.