Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматынын Ош облустук бөлүмү (мындан ары – Бөлүм) төмөнкүлөрдү билдирет.

Өлкө аймагында эттин (уй жана кой эти, сулп этинен башкасы) чекене бааларына 90 календардык күндүк мөөнөткө убактылуу мамлекеттик жөнгө салуу киргизилгендигине байланыштуу, 2025-жылдын 22-августунда Бөлүмдүн кызматкерлери тарабынан Өзгөн, Кара-Суу райондорунда, жергиликтүү бийлик органдары менен биргеликте, эттин (уй жана кой эти, сулп этинен башкасы) белгиленген бааларынын сакталышына көзөмөл жүргүзүлдү.

Мониторинг учурунда, ар бир эт сатуучуга Монополияга каршы жөнгө салуу кызматынын Ош облустук бөлүмүнүн 2025-жылдын 13-августундагы “Ош облусунун аймагында эттин (уй жана кой эти, сулп этинен башкасы) чекене бааларынын максималдуу денгээлин белгилөө жөнүндө” №4/13 буйругу тааныштырылып, керектөөчүлөр үчүн сатылып жаткан эттин белгиленген баалары көрүнүктүү жерлерге илинип туруусу боюнча түшүндүрүү иштери жүргүзүлдү.

Белгилей кетсек, Ош облусунун аймагында  уй этинин (сулп этинен башкасы) максималдуу деңгээли 670 сом жана кой эти (сулп этинен башкасы) 680 сом деп белгиленген.

Мындан кийин, Бөлүм тарабынан эттин баалары тыкыр көзөмөлдө болуп турат, белгиленген баадан жогору сатып жаткан фактылар аныкталса мыйзамда белгиленген тартипте жаза-чаралар колдонулат.