2025-жылдын 10-февралында Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматында кадрдык өзгөрүүлөр болду. Кыргыз Республикасынын экономика жана коммерция министри Бакыт Толомушевич Сыдыков Монополияга каршы жөнгө салуу кызматынын төрагасы Женалы Байсалович Орозбаев менен биргеликте жаңы дайындалган төраганын орун басарларын эмгек жамаатына тааныштырды. Кыргыз Республикасынын “Кыргыз Республикасынын Министрлер Кабинети жөнүндө” Конституциялык мыйзамынын 18-беренесине ылайык, Монополияга каршы жөнгө салуу кызматынын төрагасынын орун басарлары болуп төмөнкүлөр дайындалды: Иманкулов Муратбек Муканович, Оморов Сыргак Кенешович. Тааныштыруу учурунда Кызматтын негизги иш багыттары белгиленип, анын ичинде адилеттүү атаандаштыкты камсыздоо, керектөөчүлөрдүн укуктарын коргоо жана Кыргыз Республикасындагы Монополияга каршы мыйзамдардын сакталышын көзөмөлдөө маселелери баса белгиленди. Монополияга каршы жөнгө салуу кызматы өзүнө жүктөлгөн милдеттерди ишке ашыруу жана өлкөдөгү монополияга каршы саясатты өркүндөтүү боюнча ишин улантат.