2024-жылдын 7-10-май аралыгында чийки сүттү сатып алуу баасынын төмөндөшүнө фермер/дыйкандардын нааразы болгондугуна байланыштуу Кыргыз Республикасынын Президентинин Чүй облусундагы ыйгарым укуктуу өкүлү К.С Жумагазиевдин жетекчилигинде Чүй облусунун аймагындагы сүттү кайра иштетүүчү ишканалардын жетекчилеринин, сүттү ташып келүүчү ишкерлердин жана фермер/дыйкандардын катышуусунда жолугушуулар өткөрүлдү.

Жолугушуу төмөнкү багыттарды камтыды:

• Чийки сүттү сатып алуу баасынын төмөндөшүн карап чыгуу боюнча:
• Чийки сүттү ташып келүүчү (заготовитель) ишкерлер менен сүттү кайра иштетүүчү ишканалардын ортосундагы мамилени карап чыгуу;
• Фермер/дыйкандар өндүргөн сүттү ортомчулар жок ишканага өткөрүү боюнча;
• Чийки сүттүн базистик майлуулугун аныктоочу көз карандысыз лабораторияларды түзүү.

Жолугушуулардын жыйынтыгында баардык тараптардын маалыматтары угулду жана суроолоруна тийиштүү жетекчилер тарабынан жооптор берилди. Ошондой эле калкка толук маалымат жеткирүү үчүн Улуттук телерадиокомпаниясынын (УТРК) Чүй облустук медиаборборуна видеоматериал даярдоо боюнча тапшырмалар берилип, Чүй медиа борбору тарабынан видеоматериал даярдалды.

Жолугушуунун жыйынтыгында сүт өндүрүүчү, сүттү ташып келүүчү ортомчулардын жана сүттү кайра иштетүүчү ишканалардын ишмердүүлүгүнө дагы кошумча талдоолорду жүргүзүү менен тийиштүү министрлик жана ведомстволорго жолугушууда карлган маселелерди чечүү боюнча сунуштар берилерине токтолушту.