Бүгүн, 12-сентябрь күнү Монополияга каршы жөнгө салуу кызматы/Служба антимонопольного регулирования аянтчасында Кызматтын жетекчиси Г. К. Асылбаеванын төрагалыгы алдында “Кыргыз Көмүр” мамлекеттик ишканасынын, республиканын башка көмүр казуучу компанияларынын, ошондой эле көмүр импорттоочуларынын катышуусунда ыкчам кеңешме өткөрдү. Жыйындын катышуучуларына Кыргыз Республикасынын Министрлер Кабинетинин “Көмүр ташуунун айрым маселелери жөнүндө” токтому тааныштырылды.

      Кыргыз Республикасынын Министрлер Кабинетинин 2023-жылдын 8-сентябрындагы №453 токтомуна ылайык, Кыргыз Республикасынын аймагынан көмүрдү (ЕАЭБ ТЭИ ТН 2701 жана 2702 коддору менен классификациялануучу) автомобиль транспорту менен ташып чыгууга (“Эркештам-автожолу” жана “Торугарт-автожолу” автомобилдик өткөрүү пунктарын кошпогондо) алты айлык мөөнөткө убактылуу тыюу салынган.

     Жыйында республиканын калкын, жылуулук менен камсыз кылуучу ишканаларды жана Бишкек шаарынын ЖЭБин көмүр менен камсыздоо жана башка көйгөйлүү маселелер талкууланды.

Кеңешменин жыйынтыгы боюнча 2023-2024-жылдардын күз-кыш мезгилинин туруктуу өтүшүн мындан ары камсыздоо боюнча бир катар сунуштар түзүлөт.