2023-жылдын 8-сентябрь күнү Монополияга каршы жөнгө салуу кызматы/Служба антимонопольного регулирования Метрологиялык көзөмөлдөө башкармалыгы Бишкек шаарындагы 77-мектепте 9-10-11-класстын окуучуларынын катышуусунда “Кыргыз Республикасынын символдору жөнүндө” маалымат берүү жолугушуусун өткөрдү.
Иш-чаранын максаты – мектеп окуучуларына мамлекеттик символдор – туу, гербдин туура колдонулушу боюнча маалымат берип, патриоттук сезимдерин ойготуу.
Ачылышында алгач сөздү Метрологиялык көзөмөл башкармалыгынын башчысы А.Т. Ахмеджанова баштап, атайын даярдалган видеоролик жана презентация көрсөтүлдү. Окуучуларга мамлекеттик символдорду колдонуудагы одоно катачылыктар тууралуу маалымат берилди. Ошондой эле мамлекеттик мекеме-ишканаларда орнотулган герб жана тууга жоопкерчиликтүү мамиле жасоо керектиги айтылды.
Жолугушуунун аягында окуучулар менен суроо-жооптор орун алып, суроолорго туура жооп берген окуучуларга Кызматтын мактоо баракчалары тапшырылды.