2023-жылдын 8-9-июнунда Санкт-Петербург шаарында (Россия) Монополияга каршы саясат боюнча Мамлекеттер аралык кеңештин (МСАП) 54-отуруму жана КМШга мүчө мамлекеттердин монополияга каршы мыйзамдарын бузууларды биргелешкен иликтөө боюнча штабдын 40-жыйыны болуп өттү ( Штаб). Бул иш-чараларга КР ЭКМге караштуу Монополияга каршы жөнгө салуу кызматынын төрагасы Тайлаков Кеңешбай Доскулович, МСАП мүчөлөрү жана Кызматтын эксперттери, Штабдын жумушчу топторунун мүчөлөрү катышты. Тайлаков К.Д. МСАПтын отурумунда Кыргыз Республикасында монополияга каршы жөнгө салуу, керектөөчүлөрдүн укуктарын коргоо, жарнак жана метрологиялык көзөмөл чөйрөсүндө болуп өткөн эң көрүнүктүү окуялар, ошондой эле 2023-жылдын 11-апрелинде Кыргыз Республикасынын Президенти кол койгон “Баа түзүү жөнүндө” Кыргыз Республикасынын Мыйзамынын максаты, жөнгө салуу предмети жана чөйрөсү жөнүндө маалымат берди. Бул иш-чаралардын алкагында Кызматтын төрагасы К.Д.Тайлаков Федералдык монополияга каршы кызматынын жетекчиси М.А. Шаскольский менен эки тараптуу жолугушуу өткөрүп, Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматы менен Федералдык монополияга каршы кызматтын (Россия Федерациясы) ортосунда атаандаштык саясаты жаатында өз ара түшүнүшүү жана кызматташуу жөнүндө меморандумга кол коюлду. Ошондой эле, кол коюлган Меморандумду ишке ашыруу боюнча Планды кабыл алуу жана атаандаштык саясатын ишке ашыруу жаатында эки ведомствонун эксперттеринин билимин жогорулатууга көмөктөшүүчү биргелешкен иш- чаралардын негизинде ведомстволор аралык кызматташууну тереңдетүү боюнча макулдашууларга жетишилди. Мындан тышкары, Кызматтын төрагасы К.Д.Тайлаков Беларусь Республикасынын Монополияга каршы жөнгө салуу жана соода министри А.И.Богданов менен эки тараптуу жолугушуу өткөрүп, мурда кол коюлган Беларусь Республикасынын Монополияга каршы жөнгө салуу жана соода министрлиги менен Кыргыз Республикасынын Монополияга каршы органынын ортосундагы атаандаштык саясаты жаатында кызматташуу жөнүндө Меморандумду талкуулашты. Жолугушууларда өзгөчө көңүл азык- түлүк товарларга жана аларга бааларды турукташтыруу үчүн колдонулган механизмдерге бурулду. Жолугушуунун жыйынтыгында Меморандумдун алкагында кызматташууну улантуу, ошондой эле товарларга мамлекеттик жөнгө салуу боюнча жана ченемдик укуктук базаны өркүндөтүүдө тажрыйба алмашуу чечими кабыл алынды. Бардык иш-чаралар МСАПтын түзүлгөндүгүнүн 30 жылдыгына карата уюштурулгандыгын эске алып, сыйлык тапшыруу болуп өттү жана Тайлаков К.Д. КМШга мүчө-мамлекеттердин атаандаштык саясаты жаатындагы кызматташтыгын өнүктүрүүгө кошкон жеке салымы үчүн МСАПтын «ЗА ЗАСЛУГИ» Ардак белгиси жана Россиянын Федералдык Монополияга каршы кызматынын «ЗА ЗАЩИТУ КОНКУРЕНЦИИ» медалы менен сыйланды.