Кыргыз Республикасынын Премьер-министри А.А. Касымалиевдин 2025-жылдын 7-майындагы протоколдук тапшырмасына ылайык монополияга каршы жөнгө салуу кызматы цементтин баасына мониторинг жүргүзүүнү жана курулуш материалдар рыногундагы баанын туруксуздугунун мүмкүн болгон тобокелдиктерине жооп берүүнү улантууда.

Алсак, республиканын региондору боюнча цемент продукциясына баалардын негизсиз өсүшүнүн алдын алууга багытталган рыноктун катышуучулары менен түшүндүрүү иш-чаралары туруктуу негизде жүргүзүлүп турат.

Мониторингдин жүрүшүндө айрым цемент заводдорундагы оңдоо иштерине, ошондой эле сезондук фактордун таасирине байланыштуу, атап айтканда, “Терек-Таш” заводунда М-400-450 маркасындагы 50 кг мүшөктөгү цементтин тартыштыгы байкалган. 2025-жылдын 15-майынан тартып “Терек-Таш” заводу толук кубаттуулуктагы өндүрүшүн жандандырат. Мында даярдоочу заводдор цементтин сатуу баасын көтөрүшкөн эмес.

Экинчи рынокто продукция өндүрүүчүлөрдүн бааларына салыштырмалуу 150-200 сомго кымбат сатылууда. Чекене баалардын жогорулашынын негизги себептери болуп логистикалык чыгымдар жана айрым соода түйүндөрүнүн алып-сатарлык жүрүм-туруму саналат. Бишкекте цементтин орточо баасы бир мүшөк үчүн 500-550 сомду түзөт.

Белгилей кетсек, курулуш тармагында туруктуулукту камсыз кылуу жана өсүштүн жогорку темптерин сактоо максатында Кыргыз Республикасынын Министрлер Кабинети 2025-жылдын 31-мартында № 169 “Курулуш товарларынын айрым түрлөрүн импорттоого убактылуу тарифтик эмес чараны киргизүү жөнүндө” мурда бекитилген документке өзгөртүүлөрдү киргизүү тууралуу токтом кабыл алды.

Жаңы токтомдо Кыргыз Республикасына цементти ташып келүүгө коюлган убактылуу чектөө алынып салынды. Бул чечим курулуш материалдарына өсүп жаткан суроо-талапты канааттандырууга жана курулуш объектилеринин үзгүлтүксүз иштешин камсыз кылууга багытталган, бул болсо өз кезегинде республиканын экономикасын мындан ары өнүктүрүүгө шарт түзөт. Цементтин импортуна убактылуу тыюунун алынышы рынокто сергек атаандаштыкты колдоого, тартыштыкты алдын алууга жана курулуш материалдарына болгон бааны турукташтырат.