Кызматтын дарегине О.В. аттуу жарандан сатып алынган товар үчүн төлөнгөн акча каражатын кайтарып берүү маселеси боюнча жазма кайрылуусу келип түшкөн.

Билдирүүгө ылайык, керектөөчү “Д..Х..” дүкөнүнөн (Samsung S24) уюлдук телефонду 57000 сомго сатып алган, бирок, иш учурунда телефондун иштешинде бузулуулар пайда болгон, мисалы, камера иштебей калуу, өчүрүү ж.б. кемчиликтер бар экенин байкаган.

Ошого байланыштуу, керектөөчү эртеси күнү “Д..Х..” дүкөнүнө сатып алынган (Samsung S24) уюлдук телефонунун акча каражатын кайтарып же алмаштырып берүү боюнча өтүнүчү менен кайрылган. Бирок, тилекке каршы керектөөчүнүн талаптары “С..С..” аттуу дүкөнүнүн администратору тарабынан канааттандырылган эмес.

Кайрылуунун негизинде Кызмат Кыргыз Республикасынын Мыйзамынын ченемдерин сактоо зарылчылыгы жөнүндө, Кыргыз Республикасынын “Керектөөчүлөрдүн укуктарын коргоо” мыйзамынын 14-беренесине ылайык, эгерде сатуучу тарабынан эскертилбеген сапаты жакшы эмес товар сатылса, керектөөчү өз каалоосу боюнча:

товардын кемчилигин акысыз четтетүүнү же керектөөчү же үчүнчү жак тарабынан ал кемчиликти оңдоого кеткен чыгымдарды өндүрүүнү;

сатык баасын тиешелүү түрдө азайтууну;

ошондой маркадагы (моделдеги, артикулдагы) товарга алмаштырууну;

сатык баасын тиешелүү түрдө кайра эсептөө менен башка маркадагы (моделдеги, артикулдагы) ошондой эле товарга алмаштырууну;

Соода-сатык келишимин бузуу жана сатуучуга талаптагыдай эмес сапаттагы товарды кайтарып берүү менен товар үчүн төлөнгөн акча суммасын кайтарып берүүнү талап кылат.

Кызмат тарабынан Кыргыз Республикасынын “Керектөөчүлөрдүн укуктарын коргоо жөнүндө” мыйзамынын негизинде “Д..Х..” дүкөнүнүн администрациясы менен тиешелүү иштер жүргүзүлүп, натыйжада сатып алынган уюлдук телефону үчүн арыз ээсине 57 000 сом акча каражаты кайтарылган.