2024-жылдын 30-сентябрында Токмок шаарынын мэриясынын жыйындар залында эттин баасынын кымбатташы жана бааны турукташтыруу боюнча ишкерлер менен жолугушуу жүргүзүлдү.

Жолугушууга Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматынын Чүй облустук бөлүмүнүн башчысы, Токмок шаарынын 1-чи вице мэри, ветеринардык кызматтын Токмок шаары боюнча башкармалыгынын башчысы, базар администрацияларынын жетекчилери жана эт сатуучу ишкерлер катышышты.

Ишкерлерге эттин баасын себепсиз көтөрбөө боюнча жана уй, кой эти социалдык мааниге ээ болгон азык түлүк товарлардын тизмесине кирээри боюнча маалымат берилди.

Ал эми ишкерлер тарабынан эттин кымбаттап кетүүсүнүн негизги себептери катары мал базарларда ири мүйүздүү малдардын баалары кескин кымбаттагандыгын, акыркы айларда ири мүйүздүү малдын баасы 10000 сомдон 20000 сомго чейин кымбаттап кеткендиги менен түшүндүрүшүүдө. Ошондой эле эттин кымбатташы менен эт сатуу көлөмү азайгандыгын жана кээ бир учурларда чыгымга учурап жаткандыктарын билдиришти.

Токмок шаарында уй эти 550,0 сомдон 600,0 сомго чейин, кой эти 550,0 сомдон 580,0 сомго чейин сатылууда.

Жолугушуунун жыйынтыгы менен ишкерлерге бааны себепсиз көтөрбөө боюнча түшүндүрүү иштери жүргүзүлдү.