2024-жылдын 22-июлунда Кыргыз Республикасынын Президентинин Аппаратынын басма сөз борборунда Министрлер Кабинетинин төрагасынын орун басары – Штабдын төрагасы Б.Э.Төрөбаевдин жетекчилиги астында экономика тармактарын жана калкты 2024-2025-жылдардагы күз-кыш мезгилине даярдоо боюнча республикалык штабдын отуруму болуп өттү.

Штабдын отурумунда төмөндөгү маселелер каралды:

• суу-энергетикалык кырдаал, суу ресурстарын топтоо, импорттоо/товар алмашуу боюнча көрүлүп жаткан чаралар жөнүндө, “ЭС”, “КУЭС” ААКнын жана Бишкек шаарынын ЖЭБинин филиалдары боюнча капиталдык оңдоо жана оңдоо иштеринин пландарын аткаруу;
• жергиликтүү органдарга өткөрүп берүүнүн алкагында жылуулук менен жабдуучу ишканаларды күз-кыш мезгилине даярдоо жөнүндө;
• ЖЭБке, от казандарга, бюджеттик уюмдарга жана калкка отун (көмүр, мазут) жеткирүүнү камсыз кылуу боюнча көрүлгөн чаралардын учурдагы жыйынтыктары жөнүндө;
• күзгү-кышкы мезгил иш-чараларын каржылоо жөнүндө;
• 2024-жылдын 3-апрелиндеги “Отун-энергетикалык комплексинин айрым маселелери жөнүндө” Президенттин №89 Жарлыгын аткаруунун учурдагы статусу жөнүндө.

Штаб төрагасы Б.Э. Төрөбаевдин тапшырмаларынын бири көмүргө болгон баанын негизсиз жогорулашына жол бербөө боюнча иштерди жүргүзүү болду.

Кыргыз Республикасынын Министрлер Кабинетинин 2024-жылдын 28-майындагы “Кыргыз Республикасынын экономика тармактарын жана калкын 2024/2025-жылдын күз-кыш мезгилине даярдоо жөнүндө” №265 токтомунун 3-пунктун аткаруунун алкагында монополияга каршы орган тарабынан төмөндөгүдөй иштер жүргүзүлдү:

– ишканалар боюнча “Кыргызкөмүр” МИ тарабынан берилген тизмеге ылайык, Кыргыз Республикасынын отун-энергетикалык комплексинин ишканаларына көмүрдү жеткирүүнү ишке ашырган Кыргыз Республикасынын көмүр казып алуучу компанияларына көмүргө бааларды белгилөө боюнча;

– “Кыргызкөмүр” МИ жана “Кыргызжылуулукэнерго” МИ тарабынан каттамдар боюнча берилген маршруттар боюнча артка кетүүчү багытты эске алуу менен автотранспорт каражаттары менен көмүрдү жана мазутту ташууга бааларды маршруттар боюнча белгилөө боюнча; – Бишкек шаарынын ЖЭБине, Ош шаарынын ЖЭБине жана “Кыргызжылуулукэнерго” МИнин филиалдарына жеткирүү үчүн “М-100” маркасындагы жагуучу мазуттун тоннасына 20 529,0 сом/тонна деңгээлинде бааларды белгилөө боюнча (КНСти эсепке албаганда).