Кыргыз Республикасынын Экономика жана коммерция министрлигине караштуу Монополияга каршы жөнгө салуу кызматы “Кыргыз Республикасынын мамлекеттик тил жөнүндө” Конституциялык Мыйзамынын 26-беренесине ылайык, Кыргыз Республикасынын аймагында жарнама мамлекеттик жана расмий тилдерде жайылтыла тургандыгын маалымдайт.

Шаарлардын, айыл аймактардын аймактарында жана башка аймактарда плакаттар, такталар, жанып туруучу таблолор жана башка техникалык каражаттар түрүндөгү тышкы жарнама алгач мамлекеттик тилде, андан кийин расмий тилде жол-жоболоштурулат.

Жарнаманын мамлекеттик тилде даярдалган тексти мамлекеттик тил жана тил саясаты боюнча ыйгарым укуктуу мамлекеттик орган менен макулдашылууга тийиш.

Расмий тилдеги тексттин шрифтинин өлчөмү чоңдугу боюнча мамлекеттик тилдеги тексттин шрифтинин өлчөмүнөн кичинерээк болушу керек жана анын оң же төмөн жагына жайгаштырылууга тийиш.

Жарнама тексттеринде белгиленген тартипте катталган товардык белгилер (тейлөө белгилери), типографиялык басмаканада терилген муундук литерлер (логотиптер) түп нускадагы тилде берилиши мүмкүн.

Жарнаманын жазуу жүзүндөгү жана оозеки тексттеринде кыргыз адабий тилинин ченемдери (орфоэпиялык жана орфографиялык эрежелер) так сакталууга тийиш.

Жарнама чөйрөсүнө тийиштүү укук бузуулардын алдын алуу үчүн Кызмат жарнаманы чыгарууда, жайгаштырууда жана таратууда мамлекеттик тил мыйзамдарынын кабыл алынган ченемдерин эске алуу зарылдыгына өзгөчө көңүл бурууну суранат.

Сиздердин ишиңиздерге ийгиликтерди, мындан аркы өнүгүүнү жана жарнама мыйзамдарынын талаптарын жана Кыргыз Республикасынын Мамлекеттик тил мыйзамдарын сактоону өтүнөбүз.