2023-жылдын 18-19-май күндөрү Монополияга каршы жөнгө салуу кызматынын төрагасы Жалал-Абад облусунда болду. Кызматтык сапардын алкагында Монополияга каршы жөнгө салуу кызматынын төрагасы К.Д. Тайлаков Кыргыз Республикасынын Президентинин Жалал-Абад облусундагы ыйгарым укуктуу өкүлү А.Т.Сыргабаев менен жолугушту. Тараптар облус аймагындагы монополияга каршы жөнгө салуу маселелерине токтолуп, социалдык маанидеги товарлардын бааларына мониторинг жүргүзүүдө, керектөөчүлөрдүн укуктарын коргоодо жана атаандаштыкты өнүктүрүү жаатындагы мыйзамдардын талаптарын сактоодо тыгыз кызматташууга кызыкдар экендигин тастыкташты. Ошондой эле, К.Д. Тайлаков иш сапарынын алкагында шаардын мэри Э. А. Ормоков менен жолугушту. Жолугушууда тараптар Жалал-Абад шаарындагы социалдык маанидеги товарлардын баасын турукташтыруу, ошондой эле калкты ичүүчү суу менен камсыз кылган Жалал-Абад суу каналынын тарифтери боюнча маселелер талкууланды. Монополияга каршы жөнгө салуу кызматынын төрагасы эксперттер жана Жалал-Абад шаарынын мэринин биринчи орун басары К.Б. Иманалиев менен биргеликте мамлекеттик жана муниципалдык органдардын жана жергиликтүү калктын өкүлдөрү менен жолугушуу өткөрдү. Жолугушууда калкка көрсөтүлүүчү кызматтардын тарифтерин түзүү маселеси талкууланды. Адистер жер-жерлерде жарандардын социалдык маанилүү азык-түлүккө болгон баа боюнча суроо-талаптарына жана даттанууларына жооп берип, Кыргыз Республикасынын “Керектөөчүлөрдүн укуктарын коргоо жөнүндө” Мыйзамынын талаптарын түшүндүрүштү. Андан соң К.Д. Тайлаков монополияга каршы органдын эксперттери менен биргеликте Жалал-Абад шаарынын борбордук базарларында эт жана социалдык маанилүү товарлардын бааларына мониторинг жүргүздү. Жүргүзүлгөн мониторингдин жүрүшүндө социалдык маанилүү товарлардын баасы туруктуу жана жалпы республикалык деңгээлдин чегинде экендиги тастыкталды. Мисалы, Кызмат менен ири соода түйүндөрүнүн ортосундагы келишимге ылайык, соода түйүндөрүндө кумшекердин баасы 78 сом/кг 1 кг түзөт, андан ашканы 85 сомдон болсо, шаар базарларында кум шекер 85-90 сом/кг сатылууда. Өсүмдүк майы литрине 100-105 сомдон сатылууда. Уй эти 520-530 сом/кг, кой эти 580 сом/кг чейин сатылат. Мындан тышкары, сатуучуларга баалардын негизсиз көтөрүлүшүнө жол бербөө жана мыйзамдын талаптарын так сактоо боюнча түшүндүрүү иштери жүргүзүлдү. Ошондой эле Монополияга каршы органдын кызматкерлери шаардагы “Фрунзе” жана “Глобус” ири соода түйүндөрүндө, Токтогул районундагы жана Кара-Көл, Таш-Көмүр, Шамалды-Сай шаарларындагы соода түйүндөрүндөгү социалдык маанидеги товарлардын бааларына мониторинг жүргүзүштү. Мониторингдин жыйынтыгында сатуучуларга керектөөчүлөрдүн укуктарын коргоо жана социалдык маанилүү товарлардын баасынын негизсиз жогорулашына жол бербөө боюнча мыйзамдардын талаптары түшүндүрүлдү.