2023-жылдын 15-май күнү Монополияга каршы жөнгө салуу кызматынын төрагасынын орун басары Ж.Б. Орозбаевдин жетекчилиги алдында Монополияга каршы кызматтын аянтчасында Министрлер кабинетине караштуу Жарандык авиация мамлекеттик агенттигинин жана “Авиа Траффик Компани” ЖЧК, “Тез Джет” ЖЧК жана “Аэро Номад Эйрлайнс” ЖЧК авиакомпанияларынын өкүлдөрү менен республикалык ички авиакаттамдарга билеттердин баалары жөнүндө маселелерди талкуулоо, ошондой эле Бишкек-Баткен жана Бишкек-Раззаков багыттары боюнча авиабилеттердин баасынын жогорулашы боюнча кеңешме болуп өттү. Кеңешменин жүрүшүндө Жарандык авиация мамлекеттик агенттигинин жана авиакомпаниялардын өкүлдөрү Бишкек-Ош, Бишкек-Жалал-Абад багыттары боюнча билеттер азыркы баада сакталып, жогорулоо болбой турганын белгилешти. Бирок, Бишкек-Баткен жана Бишкек-Раззаков каттамдары боюнча үзгүлтүксүз каттамдарды жүргүзүп турган “Тез Джет” ЖЧК компаниясы баалардын жогорулашынын себептерин айтты. Бул авиакаттамдар чыгашалуу болуп саналгандыктан, авиакомпаниянын чыгымдарын жаппайт. Ушундан улам “Тез Джет” ЖЧК авиакомпаниясы мындай аргасыз чараларга барууга туура келген. Ошондой эле компания Бишкек-Баткен багытындагы билет баалары учурда 4900-6000 сомдон (мурда 4250 сом), ал эми Бишкек-Раззаков багыты боюнча 5500-6000 сомдон (мурда 4500 сом) болгонун түшүндүрдү. Кеңешменин жыйынтыгы боюнча Монополияга каршы жөнгө салуу кызматы тарабынан сунуштар даярдалып, Кыргыз Республикасынын Экономика жана коммерция министрлигине жана Кыргыз Республикасынын Министрлер кабинетине караштуу Жарандык авиация мамлекеттик агенттигине жөнөтүлдү. Авиакомпаниялардын жана керектөөчүлөрдүн кызыкчылыктарынын теңдемин камсыз кылуу максатында, авиакомпанияларга карата Кызмат тарабынан төмөнкү талаптар коюлду: – Кыргыз Республикасынын “Атаандаштык жөнүндө” Мыйзамынын талаптарын так сактоо; – баалардын негизсиз өсүшүнө жол бербөө боюнча бардык мүмкүн болгон иш-чаралар ды жүргүзүү жана керектөөчүлөрдүн укуктарын бузулушуна жол бербөө боюнча иштерди уюштуруу, ошондой эле керектөөчүлөр тарабынан келип түшкөн даттанууларга көңүл буруу; – авиабилеттердин баасынын негизсиз өсүшүнө жол бербөө боюнча алдын алуу чараларды көрүү үчүн рыноктогу кырдаал өзгөргөн учурда Кызмат менен кайтарым байланышты камсыз кылуу. – авиабилеттердин баалары өзгөргөн учурда, ал боюнча маалыматты керектөөчүлөргө жалпыга маалымдоо каражаттары аркылуу жеткирүү.