Кыргыз Республикасынын Министрлер Кабинетинин 2024-жылдын 29-майындагы № 288 токтомуна ылайык, Кыргыз Республикасынын Өкмөтүнүн 2014-жылдын 3-июнундагы № 303 “ Мамлекеттик органдар, алардын түзүмдүк бөлүнүштөрү жана ведомстволук мекемелери тарабынан жеке жана юридикалык жактарга берилүүчү мамлекеттик кызмат көрсөтүүлөрдүн стандарттарын бекитүү жөнүндө» токтому күчүн жоготту.

Кыргыз Республикасынын Министирлер Кабинетинин 2023-жылдын 3-мартынын № 115 «Кыргыз Республикасынын Министрлер Кабинетинин айрым ченем жаратуу ыйгарым укуктарын мамлекеттик органдарга жана жергиликтүү өз алдынча башкаруунун аткаруу органдарына өткөрүп берүү жөнүндө» токтому менен бекитилген Кыргыз Республикасынын мамлекеттик органдарына жана жергиликтүү өз алдынча башкаруунун аткаруу органдарына өткөрүп берилген Кыргыз Республикасынын Министрлер Кабинетинин айрым ченем жаратуу ыйгарым укуктарынын тизмесинин 2-пунктуна ылайык, мамлекеттик органдар жана жергиликтүү өз алдынча башкаруунун аткаруу органдары жогоруда аталган токтомду ишке ашыруунун алкагында административдик регламенттерди жана мамлекеттик жана муниципалдык кызмат көрсөтүүлөрдүн стандарттарын бекитет.

“Мамлекеттик жана муниципалдык кызмат көрсөтүүлөр жөнүндө” Кыргыз Республикасынын мыйзамына ылайык мамлекеттик жана муниципалдык кызмат көрсөтүүнүн стандарты – Кыргыз Республикасынын Министрлер Кабинети же тиешелүү жергиликтүү кеңеш тарабынан бекитилген, мамлекеттик же муниципалдык кызмат көрсөтүүлөргө карата коюлуучу жана кызмат көрсөтүүлөрдү керектөөчүлөр менен мамлекеттик жана муниципалдык кызмат көрсөтүүлөрдү аткаруучунун өз ара аракеттенүү жол-жобосун аныктоочу талаптардын тутумдашкан топтому камтылган документ.

Жогорудагы мыйзамдын 10-беренесинде мамлекеттик жана муниципалдык кызмат көрсөтүүнүн стандарты мамлекеттик кызмат көрсөтүүлөрдүн бирдиктүү реестрине, муниципалдык кызмат көрсөтүүлөрдүн базалык реестрине жана муниципалдык кызмат көрсөтүүлөрдүн кошумча тизмегине ылайык Кыргыз Республикасынын Министрлер Кабинети тарабынан бекитилүүчү мамлекеттик жана муниципалдык кызмат көрсөтүүнүн типтүү стандартынын негизинде кызмат көрсөтүүнү стандартташтырууга жооптуу мекеме тарабынан иштелип чыгарын көрсөтүлгөн. Жогоруда баяндалгандардын негизинде мамлекеттик жана муниципалдык бийлик органдары тарабынан тарифтердин (баалардын) прейскурантын бекитүү үчүн Кызматка материалдарды берүү учурунда Кыргыз Республикасынын Өкмөтүнүн 2000-жылдын 26-октябрындагы № 637 токтому менен бекитилген Мамлекеттик жана муниципалдык кызмат көрсөтүүлөр (иштер) үчүн акы төлөөнүн өлчөмүн аныктоонун тартибинде каралган документтердин толук пакетин көрсөтүшү зарыл, ал өзүнө административдик регламентти жана мамлекеттик кызмат көрсөтүүлөрдүн стандарттарын камтууга зарыл.